Presidenti Hashim Thaçi, ka takuar sot kryeministrin e Japonisë, Shinzo Abe, me të cilin thotë se kanë biseduar për ndërmarrjen e hapave konkretë për të rritur lidhjet ndërmjet dy shteteve.

“Tanimë në Kosovë kemi investitorë japonezë dhe kërkuam që edhe më shumë prej tyre të vijnë në shtetin tonë. Ne u zotuam se do të krijojmë një park biznesi për bizneset japoneze”, ka shkruar Thaçi në facebook.

Shkrimi i plotë i Thaçit në Facebook:

Me kryeministrin e Japonisë, kemi biseduar për ndërmarrjen e hapave konkretë për të rritur lidhjet ndërmjet dy shtete tona. E falënderova kryeministrin Abe për mbështetjen që Japonia i ka dhënë Kosovës, sidomos në fazën e shtetndërtimit, të forcimit të institucioneve, në fushën e mediave, shëndetësisë, arsimit, kulturës dhe ambientit. Është një lajm jashtëzakonisht i mirë që Japonia po rrit praninë e vet në rajonin e Ballkanit Perëndimor, derisa iniciativa e kryeministrit Abe për bashkëpunimin e shteteve të Ballkanit Perëndimor është shumë inkurajuese. Tanimë në Kosovë kemi investitorë japonezë dhe kërkuam që edhe më shumë prej tyre të vijnë në shtetin tonë. Ne u zotuam se do të krijojmë një park biznesi për bizneset japoneze. HTH (Foto: Astrit Ibrahimi)